ఖమ్మం పార్లమెంట్ సభ్యుడు రామసహాయం రఘురామిరెడ్డి – ఎమ్మెల్యే జారె ఆదినారాయణ విస్తృత పర్యటన

దమ్మపేట, అశ్వారావుపేట మండలాల్లో అభివృద్ధి పనుల ప్రారంభోత్సవాలు,
శంకుస్థాపనలు – ప్రజలతో మమేకమైన ప్రజాప్రతినిధులు

జ్వాలా వారధి న్యూస్ జూలై 18 అశ్వరావుపేట భద్రాద్రి కొత్తగూడెం జిల్లా ప్రతినిధి ఎం నాగేశ్వరరావు

భద్రాద్రి కొత్తగూడెం జిల్లా అశ్వారావుపేట నియోజకవర్గంలో అభివృద్ధి పనులు వేగవంతమవుతున్నాయి. గ్రామీణ ప్రాంతాల్లో మెరుగైన మౌలిక వసతులు కల్పించడం, తాగునీటి సమస్యలను శాశ్వతంగా పరిష్కరించడం, గ్రామాలకు నాణ్యమైన రహదారులు అందించడం లక్ష్యంగా తెలంగాణ ప్రభుత్వం చేపడుతున్న అభివృద్ధి కార్యక్రమాలకు మరో ముందడుగు పడింది.
ఈ నేపథ్యంలో ఉమ్మడి ఖమ్మం పార్లమెంట్ సభ్యులు రామసహాయం రఘురామిరెడ్డి, అశ్వారావుపేట శాసనసభ్యులు జారె ఆదినారాయణ శనివారం నియోజకవర్గంలోని దమ్మపేట, అశ్వారావుపేట మండలాల్లో విస్తృతంగా పర్యటించి మొత్తం రూ.3 కోట్ల 14 లక్షల 50 వేల వ్యయంతో చేపట్టిన అభివృద్ధి పనులను ప్రారంభించడంతో పాటు పలు పనులకు శంకుస్థాపనలు చేశారు.
పర్యటన ఉదయం దమ్మపేట మండలం నాచారం గ్రామంలో సీసీ రోడ్ల ప్రారంభోత్సవంతో ప్రారంభమైంది. అనంతరం వడ్లగూడెం, మారప్పగూడెం, నారవారిగూడెం కాలనీ, అల్లిగూడెం గ్రామాల్లో నూతనంగా నిర్మించిన సీసీ రోడ్లను ప్రజలకు అంకితం చేశారు. ఈ రహదారులు గ్రామాల్లో రవాణా సౌకర్యాలను మెరుగుపరచడమే కాకుండా వర్షాకాలంలో ప్రజలు ఎదుర్కొనే ఇబ్బందులను తొలగిస్తాయని స్థానికులు హర్షం వ్యక్తం చేశారు.
తదనంతరం అశ్వారావుపేటలో నిర్మాణంలో ఉన్న ఇంటిగ్రెటెడ్ స్కూల్, ఇకోపార్క్ పనులను ఎంపీ, ఎమ్మెల్యే పరిశీలించారు. పనుల పురోగతిపై అధికారులతో సమీక్ష నిర్వహించి, నాణ్యతకు ప్రాధాన్యత ఇవ్వాలని, నిర్ణీత గడువులో పనులు పూర్తి చేసి ప్రజలకు అందుబాటులోకి తీసుకురావాలని ఆదేశించారు. ఈ పార్కు పూర్తయితే అశ్వారావుపేట పట్టణానికి ప్రత్యేక ఆకర్షణగా మారడంతో పాటు పర్యాటక అభివృద్ధికి దోహదపడుతుందని అభిప్రాయపడ్డారు.
మధ్యాహ్నం ఊట్లపల్లి, మల్లాయగూడెం, అనంతారం, గాండ్లగూడెం గ్రామాల్లో సీసీ రోడ్లను ప్రారంభించి గ్రామస్థులతో మాట్లాడారు. స్థానిక అవసరాలను తెలుసుకుని మరిన్ని అభివృద్ధి పనులపై అధికారులకు సూచనలు చేశారు. భోజన విరామం అనంతరం జెట్టివారిగూడెం, కొత్తూరు గ్రామాల్లో చేపట్టిన అభివృద్ధి పనులను ప్రారంభించారు.
అనంతరం గుమ్మడివల్లి గ్రామంలో మహిళా సంఘాల కార్యకలాపాలు, గ్రామస్థాయి సమావేశాలు నిర్వహించేందుకు ఉపయోగపడే వీఓ (విలేజ్ ఆర్గనైజేషన్) భవనాన్ని ప్రారంభించారు. అదే గ్రామంలో సీసీ రోడ్లను కూడా ప్రజలకు అంకితం చేశారు. ఈ భవనం గ్రామాభివృద్ధి కార్యక్రమాలకు కేంద్రబిందువుగా నిలుస్తుందని అధికారులు తెలిపారు.
సాయంత్రం రమణక్కపేట గ్రామంలో సీసీ రోడ్ల నిర్మాణానికి శంకుస్థాపన చేశారు. అసుపాక గ్రామంలో సీసీ రోడ్లతో పాటు నూతన బోర్‌వెల్‌ను ప్రారంభించి గ్రామ ప్రజలకు తాగునీటి సౌకర్యాన్ని అందించారు. అనంతరం మామిళ్లవారిగూడెం, పాకలగూడెం గ్రామాల్లో సీసీ రోడ్లను ప్రారంభించి, చివరగా తోగ్గూడెం గ్రామంలో బోర్‌వెల్ నిర్మాణానికి శంకుస్థాపన చేశారు.
ఈ సందర్భంగా ఎంపీ రామసహాయం రఘురామిరెడ్డి మాట్లాడుతూ గ్రామీణ ప్రాంతాల సమగ్ర అభివృద్ధే ప్రభుత్వ ప్రధాన లక్ష్యమని, ప్రజల అవసరాలకు అనుగుణంగా మరిన్ని నిధులు తీసుకువచ్చి నియోజకవర్గాన్ని అన్ని రంగాల్లో అభివృద్ధి చేస్తామని తెలిపారు.ఎమ్మెల్యే జారె ఆదినారాయణ మాట్లాడుతూ ఎన్నికల సమయంలో ప్రజలకు ఇచ్చిన ప్రతి హామీని దశలవారీగా అమలు చేస్తున్నామని, గ్రామాల్లో మౌలిక వసతుల కల్పనకు అత్యంత ప్రాధాన్యత ఇస్తున్నామని పేర్కొన్నారు. రోడ్లు, తాగునీటి సౌకర్యాలు, గ్రామాభివృద్ధి భవనాలు, పార్కులు వంటి అభివృద్ధి పనులు ప్రజల జీవన ప్రమాణాలను మెరుగుపరుస్తాయని అన్నారు. ప్రతి గ్రామం అభివృద్ధి చెందే వరకు తమ కృషి నిరంతరం కొనసాగుతుందని స్పష్టం చేశారు.
ఈ కార్యక్రమాల్లో మున్సిపల్ వైస్ చైర్మన్, కౌన్సిలర్లు, అన్ని శాఖల అధికారులు, ఆత్మ కమిటీ చైర్మన్లు, మార్కెట్ కమిటీ చైర్మన్లు, డైరెక్టర్లు, కాంగ్రెస్ పార్టీ మండల అధ్యక్షులు, మహిళా కాంగ్రెస్, యూత్ కాంగ్రెస్, సేవాదళ్, అనుబంధ విభాగాల నాయకులు, సర్పంచులు, ఉపసర్పంచులు, వార్డు సభ్యులు, గ్రామ శాఖ అధ్యక్షులు, మైనార్టీ, బీసీ, ఎస్సీ, ఎస్టీ సెల్ నాయకులు, సోషల్ మీడియా ప్రతినిధులు, పార్టీ కార్యకర్తలు, అభిమానులు, ప్రజలు పెద్ద సంఖ్యలో పాల్గొని కార్యక్రమాలను విజయవంతం చేశారు.